Витаме, наімильшы нашы товаришы!Гнеска зас маме красну новину! Зас книжну новину! З далекой Гамерикы од нашого Лемка, нашого велького музейного камарата Владка Максимовича прышла барс цінна лемківска література: од «Ілюстрованої історії Лемківщини» Юліяна Тарновича, видавництва 1936 року, «Лемківских приповідок і прыказок зо Святковой Великой і околиц» Болеслава Баволяка, «Мойсея» Івана Франка на лемківскій бесіді, до «Моя пісня тобі і мій спів» Остапа Майчика о великім музиканті, композиторі, Лемку Іванові Майчику. В цілим Владек подарував музейови 91 книжку. О то я розумью поповніня!!!!! Оно позвалят веце знати о нашій прадідивскій землиці, чудній далекій зеленій Лемківщыні, познавати єй гисторию і культуру!! Вельке ти Боже заплат, дорогий наш Владку, за тот велький дар, за то, же завсе подле нас і душом , і ділом! Не першыраз ти помагаш музею, даруючы му сьвіже лемківске диханя!

А ми рушаме ся дале, поповняме своі фонды і запрашаме до нашой музейовой бібліотекы!

Оставайте жыви і здорови.

Трымайме ся купы.

Ваш музей.